Kökshetaulyqtar «Qazaq degen halyqtyñ erkesimin» atty jaña kontsertti tamashalady. Köpten kütken ülken kontsertti Roza Bağlanova atyndağy «Qazaqkontsert» memlekettik kontserttik ūiymynyñ ärtisteri men shyğarmashylyq ūjymdary ūsyndy.

Is-shara KSRO men Qazaqstannyñ Halyq ärtisi, Halyq qaharmany Roza Bağlanovanyñ 100 jyldyğyna arnalady.

«Kökshetau» mädeniet saraiyna jinalğan qalyñ körermen Roza Bağlanovanyñ «Ah, Samara – gorodok», «Ädemi-au», «Bärinen de sen sūlu», «Säulem-ai», «Iñkärim-ai», «Aqtamaq», «Syr güli» t.b. syndy ataqty änderin Qazaqkontsert ärtisteriniñ oryndauynda tyñdady. Sahnada Erlan Rysqali, Azamat Jyltyrközov, Ardaq Balajanova, Klara Tölenbaeva, Erbolat Shaldybekov, Bibigül Janūzaq, Dinislambek Jailaubai, Künsūlu Türikpen, Nūrbolat Arzamasūly, Asqar Mūqiyat, Saltanat Meñdiğalieva, Äigerim Altynbek, Gülnar Köshenova, Birjan Aitahmetov, Zarina Jakenova jäne kompozitor Bauyrjan Aqtaevtyñ körkemdik jetekshiligimen «Astana sazy» memlekettik folklorlyq ansambli öner körsetti.

Merekelik kontsert körermenderge ūmytylmas äser syilap, olardyñ zor yqylasyna bölendi. Qazaqkontserttiñ gastroldik kontserti pandemiya men qatañ karantindik shekteulerden keiin tūrğyndardyñ eñsesin köterip, tyñdarmannyñ joğary bağasyn aldy.

«Roza Bağlanova atyndağy «Qazaqkontsert» ūiymynyñ resmi ökili Elaman Tölepbergen mälimdegendei, ataqty änshiniñ 100 jyldyq mereitoiyn merekeleu resmi türde Qazaqkontsertten bastau alğan edi.

«Elimizdiñ eñ iri kontserttik ūiymy retinde Qazaqkontsertke byltyr Roza Bağlanovanyñ esimi berildi. Biyl bizdiñ ūiym änshiniñ 100 jyldyq mereitoiyna arnap köptegen ülken jobalardy qolğa aldy. Solardyñ biri – bügingi merekelik kontsert. Elordadan bastau alğan būl jaña joba elimizdiñ özge de öñirlerinde jalğasyn tappaq. Kökshetau qalasynan keiin bizdiñ gastrolder Petropavl, Pavlodar, Qarağandy öñirlerinde ötedi. Maqsatymyz – ūly änshiniñ esimin halyq jadynda mäñgi saqtauğa öz ülesimizdi qosu jäne öñirlik kontserttik ūiymdarmen özara bailanysyn arttyru, täjiribe almasudyñ jaña formatyn engizu»,- dep jetkizdi Elaman Tölepbergen.

Eske salsaq, Roza Bağlanovanyñ ğasyrlyq mereitoiy osy jyldyñ 1-nauryzynda Nūr-Sūltan qalasynda saltanatty türde ashylyp, respublikanyñ barlyq aimağynda ūiymdastyryluda. QR Mädeniet jäne sport ministrliginiñ bastamasymen jüzege asyrylatyn būl is-sharalar būqaralyq sipatqa ie bolyp, jyl köleminde elimizdiñ barlyq öñirlerinde ötkiziletin bolady.