Негізгі бет

Роза Бағланованың туғанына 100 жыл

Роза Бағланова 1922 жылдың 1 қаңтарында Қызылорда облысы Қазалы ауданында дүниеге келген. Туған кезде оған Үрбибі есімі берілгенімен, кейін ол бүкіл әлемге Роза Бағланова есімімен танылды. Бұл есім әнші көзі тірісінде-ақ аңызға айналды. Розаның құрметіне көптеген ата-аналар қыздарына осы әсем есімді қоя бастады. Соның жарқын мысалы – Қазақстанның халық әртісі, Қазақстанның Еңбек Ері Роза Рымбаева. Ол өз есімін Роза Тәжібайқызының құрметіне алған.

Роза Бағлановаға музыкаға деген сүйіспеншілік бала кезінен дарыды. Ол табиғи талантын ерте жастан дамытып, әншілік өнердің өзінің өмірлік жолы екенін түсінді. Алайда ХХ ғасырдың 30–40-жылдарындағы ауыр кезеңдер әншінің отбасын да айналып өтпеді. Әкесінен айырылған жас Роза қайсарлық танытып, отбасының жалғыз асыраушысына айналды.

Отбасының тұрмыстық жағдайы қиындаған кезде, 1940 жылдары Роза Бағланова Ташкент қаласындағы тоқыма институтына оқуға түседі. Мұнда ол оқуын еңбекпен қатар алып жүруге мүмкіндік алды. Дәл осы қалада Роза Тәжібайқызының үлкен шығармашылық жолы басталды. Ол Өзбек КСР-інің Мемлекеттік әйелдер ән және би ансамблінің солисі болды. Осы ансамбль құрамында 19 жасар Роза Бағланова майданға аттанды.

Толығырақ

Qazaqconcert туралы

Роза Бағланова атындағы «Қазақконцерт» мемлекеттік академиялық концерттік ұйымы 1960 жылы Алматы қаласындағы Жамбыл атындағы мемлекеттік филармонияның негізінде құрылды. 1960 жылғы 15 шілдеде Мәдениет министрлігінің шешімімен шығармашылық бірлестік филармония құрамынан бөлініп шықты.

1960–1961 жылдары «Қазақконцерттің» алғашқы көркемдік жетекшісі болып Қазақ КСР-нің еңбек сіңірген қайраткері, композитор, домбырашы Мәқалим Қойшыбаев тағайындалды.

«Қазақконцерттің» алғашқы құрамында Ш. Жиенқұлова, М. Ержанов, Ж. Омарова, Ж. Елебеков, Ғ. Баязитова, Р. Есімжанова, Ү. Тұрдықұлова, Н. Тапалова, Р. Бағланова, М. Хамзин және қазақ мәдениетінің өзге де көрнекті қайраткерлері болды. Кейін олардың қатарына Е. Рахмадиев, С. Тыныштығұлова, Ә. Есқалиев, С. Шүкіров, Ғ. Талпақова секілді танымал өнер иелері қосылды.

XX ғасырдың 60–80 жылдары аралығында «Қазақконцерттің» шығармашылық базасында «Балбырауын», «Медео», «Әсем ән мен тәтті күй», «Қыздар-ай», «Перне», «Рауан» концерттік бригадалары, сондай-ақ «Всюду с песней», «Молодость в пути», «Арай», «Жалын», «Дәурен» ансамбльдері, «Самал» халық аспаптар ансамблі құрылды. Кейіннен «Дос-Мұқасан», «Арай», «Серпер» шығармашылық ұжымдары осы дәстүрді жалғастырып, қазақстандық өнерді әлемдік деңгейде танытты.

2016 жылы «Қазақконцерт» Астана қаласына көшіріліп, Қазақстан Республикасы Мәдениет және спорт министрлігі Мәдениет комитетінің «Қазақконцерт» мемлекеттік концерттік ұйымы мәртебесіне ие болды.

Қазіргі таңда ұйым ТМД елдерінде баламасы жоқ, заманауи технологиялармен жабдықталған және бірегей сәулеттік нысан саналатын «QAZAQSTAN» орталық концерт залында қызмет атқарады.

2021 жылы «Қазақконцертке» Қазақстанның халық әртісі, Қазақстанның Халық қаһарманы Роза Бағланованың есімі берілді.

2023 жылы Қазақстан Республикасы Үкіметінің қаулысымен Роза Бағланова атындағы «Қазақконцерт» мемлекеттік концерттік ұйымына «академиялық» мәртебе берілді.

«Қазақконцертте» халық өнері, классикалық музыка және эстрада жанрларының барлығы қамтылған. Қазақстанның заманауи музыкалық өнерін А. Қоразбаев, А. Мұсахаджаева, Р. Рымбаева, М. Жүнісова, А. Нұрмағамбетова, Ж. Ысқақова, Б. Самединова, Қ. Махан, А. Елшібаева, А. Балажанова, М. Салықов, Қ. Төленбаева, Е. Жанаберген, Д. Құдайберген, Е. Рысқали, А. Желтіргізов, М. Әуелбекова сынды өнер қайраткерлері, сондай-ақ «Астана сазы» мемлекеттік фольклорлық ансамблі, «TURAN» этно-фольклорлық ансамблі, «FORTE TRIO» мемлекеттік триосы, Қазақ мемлекеттік симфониялық оркестрі, «ASTANA MUSICAL» мемлекеттік театры, «Халық қазынасы» ұлттық өнер орталығы, Классикалық өнер бөлімі, «Saz&Soul» вокалды-аспаптық ансамблі және басқа да шығармашылық ұжымдар таныстырып келеді.

Өзінің көпжылдық тарихында «Қазақконцерт» Қазақстан мәдениетінің флагманына айналды. Мұнда еліміздің үздік әртістері мен шығармашылық ұжымдары шоғырланған. Ұйымның концерттік кештері әрдайым көрерменнің кең аудиториясын жинайды. Музыкалық бағдарламалар жанрлық алуандығымен және ұлттық әрі әлемдік өнердің үздік туындыларын насихаттауға ұмтылатын орындаушылардың жоғары кәсіби шеберлігімен ерекшеленеді.

Толығырақ