Qazaq memlekettik sımfonıalyq orkestri – Qazaqstan Respýblıkasynyń úzdik mýzykalyq ujymdarynyń biri. Memlekettik orkestrdiń quramynda qazirgi zamanǵy qazaqstandyq mýzykalyq ónerdi halyqaralyq arenada nasıhattap, kameralyq mýzykanyń álemdik dástúrin jalǵastyrýshy 90 jýyq joǵary kásibı mýzykanttar, halyqaralyq baıqaýlardyń laýreattary eńbek etýde.

Orkestr ártúrli dáýirler men stılderdiń týyndylaryn sheber oryndap, barokolyq, klasıkalyq jáne zamanaýı mýzykany, qazaq kompozıtorlarynyń týyndylaryn, halyq ánderi men kúıleriniń óńdelgen nusqalaryn oryndap júr. Atap aıtar bolsaq, «Adajıo dlá strýnnyh» (S.Barber), «Serenada» (P.Chaıkovskı), «Vengerskıe tansy» (I.Brams), «Vestsaıdskaıa ıstorıa» (L.Bernstaın), «Noktúrn», «Rekvıem» (A.Dvorjak), «Strýnnaıa serenada» (E.Elgar), «Karmen» (J.Bıze), jáne t.b.

Sımfonıalyq orkestr dúnıejúzine belgili dırıjerlardyń qatysýymen ótetin arnaıy konserttik baǵdarlamalardy uıymdastyrady. Qazaqstandyq orkestrdiń sheberligin áıgili maestrolar – I.Sýk (Chehıa), V.Chapek (Avstrıa), E.Shmıder (AQSh), O.Shmıdt-Gertenbah, Iý.fon Bertolı (Germanıa), V.Fedoseev, K.Orbelán (Reseı), Rın Iong Iang (Ońtústik Koreıa), D. Bartolossı (Brazılıa), G. Emılson (Islandıa) moıyndaǵan. Orkestr Reseıdiń (V. Spıvakov, V. Tretákov, T. Grındenko, M. Pletnev, I. Gavrysh, E. Grach, S. Kravchenko, R. Agaronán, V. Saradjan jáne t.b.), Avstrıanyń (G. Vınıshhofer, D. Shvarsberg), Izraıldiń (M. Kýgel, A. Levıtan), Germanıanyń (K. Blaher), AQSh (A. Slobodánık), Norvegıanyń (I. Shýldman), Shvesıanyń (A. Stenberg) úzdik oryndaýshylarymen birlese óner kórsetedi. Qazaqstan Respýblıkasy Mádenıet jáne sport mınıstrliginiń qoldaýymen óner ujymy jyl saıyn halyqaralyq festıváldarǵa qatysyp, Eýropanyń (Germanıa, Avstrıa, Italıa, Anglıa, Reseı, Fransıa), Azıanyń (Koreıa, Týrkıa, Japonıa) úzdik konserttik zaldarynda óner kórsetedi.

Orkestr 1991 jyly álemge tanymal skrıpkashy, QR Halyq ártisi, Qazaqstannyń Eńbek Eri, Memlekettik syılyqtardyń laýreaty, halyqaralyq baıqaýlardyń laýreaty, profesor, Qazaq ulttyq óner ýnıversıtetiniń rektory Aıman Musaqojaevanyń bastamasymen qurylǵan. Memlekettik sımfonıalyq orkestrdiń bas dırıjeri – Qazaqstan Respýblıkasynyń eńbek sińirgen qaıratkeri, Qazaq ulttyq óner ýnıversıtetiniń profesory Bahytjan Musahodjaeva.