«Astana Musical» – elimizdegi jáne Ortalyq Azıadaǵy tuńǵysh memlekettik múzıkl teatry. Múzıkl – ártúrli óner janrlarynyń bir arnaǵa toǵysýy. Mýzyka, horeografıa, aktórlik sheberlik, akrobatıka sekildi eń ozyq úlgilerdi biriktirip kórsetetin mýzykalyq-sahnalyq qoıylym.

2016 jyly qurylǵan «Astana Musical» memlekettik teatrynyń ónerpazdary – respýblıkalyq jáne halyqaralyq baıqaýlardyń laýreattary. Teatrdyń kórkemdik jetekshisi – belgili rejısór Eslám Nurtazın.

«Astana Musical» memlekettik teatry QR Tuńǵysh Prezıdenti N.Á.Nazarbaevtyń «Jahandaǵy zamanaýı qazaqstandyq mádenıet» jobasy sheńberinde 2017 jylǵy jeltoqsan aıynda Evropanyń eń iri bes qalasyn (Parıj, Máskeý, Brússel, Vena, Berlın) qamtyǵan halyqaralyq gastróldik týrne ótkizdi. 2018 jyly «Astana Musical» álem teatrlarynyń óner alańyna aınalǵan «Avınon» halyqaralyq teatr festıvaline qatysty.

Memlekettik teatrdyń repertýarynda «Astana – meniń mahabbatym», «Er Tóstik» ertegisi, retro-hıt ánderge negizdelgen «Dostar serti» qoıylymy, M.Maqataevtyń «Jyrlaıdy júrek», aqyn O.Turjannyń «Men saǵyndym...» poetıkalyq múzıklderi, «Qyz Jibek» etno-folklorlyq qoıylymy, R.Kýnıdiń «№13» komedıasy, tuńǵysh ret qazaq tilinde qoıylǵan álemge áıgili «Romeo men Djýletta», Gınnestiń rekordtar kitabyna engen «Notre Dame de Paris» múzıklderi, "Shańyraq" eksperımentaldyq mýzykalyq performansy, "Sıqyrly sazdy hor-konsert" bar.