Қазақстан Республикасының мемлекеттік триосы FORTE TRIO Софияда Қазақстан Республикасының Республика күні мен ел Тәуелсіздігінің 35 жылдығына арналған мерекелік концерттік бағдарламамен өнер көрсетті.

Концерт Болгария астанасының тарихи мәдени орындарының бірі - Софиядағы Орталық әскери клубта өтті. Тимур Урманчеев (фортепиано), Мақсат Жүсіпов (скрипка) және Мұрат Нәрбеков (виолончель) орындауында Феликс Мендельсонның №2 до минор фортепианолық триосы, Астор Пьяццолланың «Invierno Porteño» және «Primavera Porteña» шығармалары, А. Толукпаевтың өңдеуіндегі «Япурай» қазақ халық әні, сондай-ақ «Кероғлы» мен «Ән шашу» туындылары орындалды. Бағдарлама еуропалық классика мен Қазақстанның ұлттық музыкалық мұрасын тоғыстырды.

Қазақстанның Болгариядағы Елшілігі ұйымдастырған іс-шараға Болгарияның мемлекеттік органдары мен парламентінің өкілдері, дипломатиялық корпус, қазақ диаспорасы және бұқаралық ақпарат құралдарының өкілдері қатысты.

Қазақстанның Болгариядағы Елшісі Виктор Темірбаев пен Болгария Сыртқы істер министрінің орынбасары Христо Полендаков құттықтау сөз сөйледі. Олар тәуелсіздіктің маңызын, екі ел арасындағы достық қарым-қатынасты және экономика, білім мен мәдениет салаларындағы ынтымақтастықты кеңейту перспективаларын атап өтті.

FORTE TRIO-ның халықаралық қызметі - қазақстандық өнерді шетелде танытудың маңызды бөлігі. Музыка арқылы ұжым шетелдік көрермендерді ұлттық мәдени мұрамен таныстырып, гуманитарлық байланыстарды нығайтады және халықтар арасындағы диалогқа жол ашады. Софиядағы өнер көрсету Қазақстан мен Болгария арасындағы мәдени ынтымақтастықты дамытудағы тағы бір маңызды қадам болды.