Жеңіс күніне орай 9 мамыр күні «Қазақконцерт» мемлекеттік академиялық концерттік ұйымының сахнасында «ASTANA MUSICAL» мемлекеттік театрының «Роза Бағланова» мюзиклі сахналанды.

Қойылымның дәл осы тарихи күні көрсетілуі ерекше символдық мәнге ие болды. Шығармашылық туынды тек көрнекті әнші, Қазақстанның Халық Қаһарманы Роза Бағланова тұлғасына ғана емес, тағдыры Жеңіс тарихымен тығыз байланысты жеңімпаз ұрпаққа деген құрметтің белгісіне айналды.

Спектакль көрерменге қазақ өнерінің дара тұлғасына айналған ұлы әншінің бай шығармашылық мұрасымен қайта қауышуға мүмкіндік берді. Оның өнері мен азаматтық ерлігі отандық мәдениет тарихында мәңгілік орын алды. Жеңіс күні Роза Бағланова бейнесі халыққа адал қызмет етудің, патриотизм мен қайсарлықтың символы ретінде ерекше әсерлі көрініс тапты.

Баршаңызды Жеңіс күнімен құттықтаймыз! Елімізге бейбітшілік, амандық, береке тілейміз. Батырларымыздың жарқын бейнесі мен ерлігі әрдайым жүрегімізде сақталсын.