Дастан Ибрагимов — Қазақ мемлекеттік симфониялық оркестрінің көркемдік жетекшісі және бас дирижері. Құрманғазы атындағы Қазақ ұлттық консерваториясында білім алып, «Симфониялық дирижерлеу» мамандығы бойынша бакалавриат пен магистратураны тәмамдаған. Қазақстанның және шетелдің жетекші оркестрлерімен өнер көрсеткен. Ресей, Болгария, Венгрия, Италия және Біріккен Араб Әмірліктерінің сахналарында жұмыс істеген. Оның шығармашылық қызметіндегі маңызды жобалардың қатарында Мәскеудегі «Зарядье» концерт залы, Пловдив мемлекеттік операсы және Дубай операсындағы концерттер бар. Дирижердің шығармашылық қызығушылығы кең симфониялық репертуарды қамтиды — Вена классиктерінен бастап ХХ ғасыр музыкасына дейін. Әсіресе Бетховен, Брамс, Дворжак, Чайковский, Сибелиус, Рахманинов және Шостакович шығармаларына ерекше назар аударады. Орындаушылық қызметімен қатар музыкалық-ағартушылық бағытта да белсенді еңбек етеді. Академиялық музыканың тыңдарман аудиториясын кеңейтуге бағытталған лекциялық және білім беру жобаларының авторы болып табылады.